NOVAS DESDE CAMBRE

COMUNICADO DE PRENSA

Compostela, 26 de xaneiro de 2015.

ESQUERDA UNIDA MANIFESTA QUE A VITORIA DE SYRIZA AMOSA COMO AS ALIANZAS AMPLAS DA ESQUERDA PODEN GAÑAR

A executiva nacional de EU considera a vitoria de Syriza como a vitoria da esquerda en Grecia, porque supón un episodio histórico de suma e encontro de múltiples organizacións da esquerda a partir dos anos 90 e porque implica un golpe decisivo ás políticas da troika.

Esquerda Unida felicita ao pobo grego, a Syriza e ao resto de partidos integrantes do PARTIDO DA ESQUERDA EUROPEA, motor importante do programa alternativo da esquerda rupturista dende fai anos e que forma parte do sustrato propositivo de Syriza.

Para Esquerda Unida, sen extrapolar escenarios ao resto de Europa, Grecia amosa como a prioridade no actual contexto é conseguir a unidade que hoxe reclama unha ampla maioría social, desde unha “clase media proletarizada e precarizada” ata os sectores máis golpeados polos efectos da crise e as políticas de recortes.

Para EU, o exemplo de Grecia, con máis de 30 folgas xerais dende 2009, amosa que esta unidade se fragua en torno á necesaria mobilización e loita social. Unidade nos valores, nos principios, na convicción de profundizar nunha sociedade radicalmente democrática. Pero Unidade tamén nas institucións, sempre cun programa cidadán como sustento ideolóxico alternativo, como nexo de unión, como compromiso de cumprimento e como mecanismo de control do goberno.

Esquerda Unida trasladou formalmente hoxe unha felicitación á secretaría de relacións internacionais de Syriza.

Gabinete de prensa.

Executiva Nacional de Esquerda Unida.