NOVAS DESDE CAMBRE

Benquerida compañeira/o:

Na cidade da Coruña somos moitas as persoas e colectivos que por defendermos dereitos como o da liberdade de expresión, de manifestación, ou o dereito á saúde e educación pública e de calidade, á vivenda,  etc., estamos a sufrir o aumento da intensidade na vixilancia policial e a criminalización durante as accións de protesta e actuacións comunitarias –chegando mesmo á prohibición-, acosadas/os por unha violenta presenza policial en moitas das protestas convocadas, así coma tendo que sufrir a práctica de identificacións “aleatorias” das persoas que participamos nas mobilizacións e, nos últimos tempos, á constante chegada de propostas de sanción por participar en mobilizacións cidadás.

A ninguén se lle escapa que, aliás do desgaste económico, o obxectivo fundamental deste hostigamento constante e propostas de sanción  é disuadir á cidadanía para que non se mobilice, non vaia a ser que nos saia ben, como pasou co caso de Aurelia…

 Para denunciar esta situación de reiterada vulneración dos dereitos fundamentais por parte do Concello da Coruña e da Delegación e Subdelegación do Goberno vimos de convocar unha concentración conxunta baixo o lema "MULTANNOS A NÓS PRA ASUSTARTE A TI", para deste xeito poñer sobre a mesa a represión da solidariedade que estamos a sufrir tódolos colectivos e movementos sociais, así coma o obxectivo desmobilizador que teñen estes ataques.

Agardamos poder contar contigo e agradecémoste de antemán a difusión desta convocatoria.

Vémonos o vindeiro XOVES 11 DE XULLO ás 20.00hrs. no OBELISCO (A CORUÑA).