NOVAS DESDE CAMBRE

INICIATIVAS PRESENTADAS POLO GRUPO MUNICIPAL DA "ACDC" AO PLENO ORDINARIO DO MES DE MAIO

MOCIÓN SOBRE A XESTIÓN DOS RESIDUOS DE FIBROCEMENTO E CONTAMINACIÓN POR AMIANTO E AS SÚAS AFECCIÓNS AMBIENTAIS PARA A SAÚDE.

EXPOSICIÓN DE MOTIVOS:

O amianto  é un mineral metamórfico fibroso cuxas características son que as súas fibras, son o suficientemente flexibles para ser entrelazadas polo que así soporta grandes temperaturas. Por estes motivos foi moi utilizado entre os anos 60, 70 e 80 como illante en fornos e calefaccións, tubaxes,, e múltiples materiais de construción  en forma de compoñente,  coñecidos como uralita. Tense constancia de que, sobre todo nos anos 70, importáronse ao redor de 100.000 toneladas de amianto, e de que a maioría de edificios construídos entre 1965 e 1985 conteñen este produto. Algúns expertos, calculan que no noso país a xente vivimos entre tres millóns de toneladas de amianto.

As autoridades médicas demostraron nos anos 80 que os produtos que conteñen amianto provocan cancro cunha elevada mortalidade. O po de fibras de amianto invisible a primeira ollada pode ser inhalado por persoas e animais, producindo, segundo os estudos, 15 ou 30 anos máis tarde, cancro de pulmón, estómago, pleura e peritoneo,  calcúlase que morren por esta causa un milleiro de persoas ao ano no Estado español.

No caso da recollida de residuos de Amianto, o Concello remítese ás normativas de rango autonómico e estatal, e na web municipal non se atopa ningún tipo de información que oriente aos veciños que teñan ese material, sobre todo ferros de uralita, respecto dos procedementos que deben seguirse para a súa recollida e posterior tratamento. Non é inusual, por tanto ver ferros ou tubaxes de uralita nos colectores de lixo ou nos arredores dos Puntos Limpos, debido a que non se sabe ou se descoñece que facer con estes materiais ou ben á imposibilidade de poder afrontar o custo económico que supón contratar a unha empresa especializada en desamiantado.

Outro aspecto que preocupa a este grupo municipal é a presenza de elementos fabricados con fibrocemento nos centros educativos do municipio. Existen exemplos, algúns deles que xa trouxemos mediante distintas iniciativas a este Concello.

Desde a ACDC entendemos que o Concello, como institución máis próxima ao cidadán, debe ter un papel máis activo neste asunto e dar cumprimento as iniciativas aprobadas en relación a este problema. 

POLO EXPOSTO PROPOÑEMOS AO PLENO A ADOPCIÓN DOS SEGUINTES ACORDOS:

1º.- Que por parte dos servizos técnicos municipais se redácte e publique un informe sobre a situación actual da xestión de residuos de fibrocemento.

2º.- Que se estude a posibilidade de complementar as ordenanzas existentes, tanto a actual de limpeza e medioambiente ou as urbanísticas, cunha regulación das licenzas de obras onde se garanta que, cando se vaian a realizar obras, reparacións ou derribas de edificios, así como no posterior tratamento dos mesmos, aplíquese escrupulosamente o Real Decreto 396/2006, do 31 de marzo, que establece as medidas preventivas para a protección dos traballadores e persoas expostas ó amianto. 

3º.- Proceder á elaboración dun Plan para a progresiva substitución dos compoñentes de fibrocemento nos colexio e edificios públicos municipais e instar á Consellería de Educación a que se realicen actuacións similares nos CEIP e IES do concello, así como para a progresiva substitución das tubaxes de fibrocemento.

4º.- Que se valore a posibilidade de poñer en marcha campañas de información aos veciños, en particular sobre o risco que supón a inadecuada manipulación do Amianto, e informar de cales son os pasos que deben seguir para poder contactar con empresas autorizadas para o tratamento destes materiais e os seus residuos, e dos programas de axudas económicas se os houbese. 

ROGOS:

1.-  Existe unha fonda preocupación entre os veciños do Temple, pola dimensión que está tomando a demora na posta en funcionamento do  Centro de Saúde. Esta obra está acumulando retrasos de case un ano, cos conseguintes perxuizos para os veciños de Cambre e en especial para os da parroquia do Temple, onde a dotación sanitaria existente, é claramente insuficiente.Diante desta situación, chama a atención que non exista unha información detallada por parte das administracións responsables sobre os prazos previstos para a súa apertura ou dos motivos que a impiden. Polo exposto PREGAMOS nos informen cales foron as xestións realizadas polo Goberno sobre o mencionado asunto e da demora na entrada en servizo desta infraestructura sanitaria.

2.- Somos coñecedores de que se están levando a cabo diferentes roldas de reunións por parte do Goberno con hostaleiros e técnicos ó obxecto de darlle forma á iniciativa de desenvolver unha feira no Temple. Compre recordar que esta iniciativa foi unha proposta da ACdC incluída no noso programa. Agradecemos ó goberno que unha vez mais asuma como propia unha iniciativa nosa, aínda que non estaría de mais, atendendo a criterios de honestidade e transparencia que foramos invitados tanto a ACdC, como por extensión, os demais grupos políticos, para poder darlle a esas reunións un prisma mais amplo do que poden plasmar os hostaleiros, o goberno, e os técnicos.  

Fáltannos en ditas reunións as opinións dos veciños, representados democráticamente nos grupos municipais que formamos parte da Corporación. 

PREGAMOS: Sexamos incluídos todos os grupos da Corporación nas conversas ou tidos en conta de cara á configuración dunha iniciativa propia da ACdC, que coidamos será unha fonte dinamizadora e de recursos para o noso concello en Xeral e para a parroquia do Temple en particular. Asímesmo pregamos que na presente sesión se nos informe por parte da concelleira responsable do estado das citadas conversas.

3.- Recentemente publicábase na prensa que o Goberno de Cambre iniciara contactos con diferentes asociacións xuvenís para chegar a crear unha comisión de festas en Cambre que organizara as patronais de Santa María.

Tendo en conta que estamos a escasos tres meses das citadas festas, dende o noso grupo PREGAMOS  ó Concelleiro responsable nos informe sobre o estado de ditas conversas e contactos de cara a poder esclarecer qué acontecerá coas festas patronais de Cambre para este ano 2016. 

PREGUNTAS:

1.- Transcorridos seis meses  dende a presentación  dunha iniciativa sobre a salubridade da auga nas fonte públicas do concello, o noso Grupo  PREGUNTA:

¿Que medidas preventivas  ten tomado o Goberno   sobre a calidade da auga nas fontes públicas do termo municipal de Cambre?

2.-  Según a XGL do 9 de maio de 2016, no recollido no apartado de informes do concelleiro delegado da área de RRHH e SS, Don Juan Evaristo Rodríguez Vazquez, infórmase no seu tenor literal do seguinte:

 "En canto ao técnico de orientación laboral, decidiuse interromper a colaboración co Servizo Público de Emprego de Galicia".

Dende o noso GM preguntámosnos sobre a conveniencia da interrupción desta colaboración aínda que a insuficiente información da que dispoñemos nos leva a cuestionarnos si será a suspensión desta colaboración un agravante para aquelas persoas desempregadas de Cambre, e por este motivo,

 

PREGUNTAMOS: 

¿Poden informarnos mais pormenorizadamente dos motivos que levaron a esta decisión así como das consecuencias que esta orixinará nos veciños demandantes de emprego?

3.- No pasado mes de Abril o Goberno suspendeu os bailes organizados pola Asociación da Terceira Idade de A Barcala, debido ós ruídos que esta actividade xenera e que o local non parece reunir as condicións legales necesarias para levar a cabo este tipo de eventos. 

A decisión do Goberno foi dar cumplimento ó informe xurídico e suspender de inmediato a actividade antes de darlle unha solución ó problema, orixinando un grave descontento entre moitos dos usuarios.

             

Actualmente non temos coñecemento de en qué situación se atopan as conversas entre o Goberno e a Asociación ou si existe algunha solución que sexa de satisfacción das dúas partes.

PREGUNTAMOS:

 ¿Se nos pode informar polo goberno sobre a actual situación deste conflicto?

Cambre a 20 de MAIO de 2016

Asdo: Olga Santos López. Voceira do Grupo Municipal Asemblea Cidadá de Cambre- Son