NOVAS DESDE CAMBRE

INICIATIVAS DO GRUPO MUNICIPAL DE “ESQUERDA UNIDA” AO PLENO E COMISIÓNS INFORMATIVAS DO MES DE XUÑO 2014.

                                                              

MOCION DO GRUPO MUNICIPAL DE ESQUIERDA UNIDA

SOBRE O SERVIZO DE COMEDOR NOS CENTROS EDUCATIVOS PÚBLICOS  DO CONCELLO

EXPOSICIÓN DE MOTIVOS:

O pasado dia 11 de Xuño, o Parlamento de Galicia aprobou por unanimidade unha Proposición non de Lei na que se resolve que "O Parlamento de Galicia insta á Xunta de Galicia a levar a cabo as medidas necesarias para evitar que ningún neno ou nena careza de alimentación ou sustento necesario por estar en situación de vulnerabilidade, poñéndose en marcha convenios cos concellos interesados, podéndose usar as instalacións dos centros educativos en colaboración cos servizos públicos de benestar" .

O curso escolar, nos seus niveis obrigatorios, rematou o dia 20 de xuño e moitas familias galegas non saben como poder garantir unha axeitada alimentación para os seus fillos e fillas nos dous meses non lectivos, diante da grave situación socioeconómica pola   que están a atravesar, a que o noso concello non e alleo.

Segundo os datos oficiais, en Galicia hai 93.000 familias con todos os seus membros en paro, o 23% da poboación atópase en situación de pobreza, 33.000 familias sobreviven sen ningún tipo de ingreso e un 26% dos fogares con menores a cargo están en risco de exclusión social.

Un de cada catro menores de dezaseis anos vive por debaixo do umbral da pobreza no noso pais segundo o Instituto Nacional de Estatística, na mesma liña en que se teñen manifestado organizacións como UNICEF, Caritas e Cruz Vermella.

O profesorado galego, ó igual que os representantes das asociacións de nais e pais, relatan a existencia dun número importante de sinais de alarma sobre a situación que atravesan moitos fogares galegos: nenos e nenas que acoden ó colexio sen almorzar, episodios de mareos e mesmo desmaios entre o alumnado durante a xornada escolar, rapaces que comen de xeito compulsivo no comedor escolar, repetindo varias veces o menú, baixada inxustificada no rendemento académico etc, síntomas todos eles evidentes de que a pobreza infantil está a deixar xa unha fonda pegada na vida de moitos nenos e nenas de Galicia.

Diante destas e doutras situacións, mesmo a Defensora del Pueblo, dona Soledad Becerril, solicitou  a todas as Consellerías de Presidencia das Comunidades Autónomas que os comedores escolares atendan este verán ós menores en situación de vulnerabilidade.

Por todo o exposto e tendo en conta a situacion de urxencia e emerxencia que poidan ter  familias do noso Concello.

O GRUPO MUNICIPAL DE ESQUERDA UNIDA PROPÓN AO PLENO A ADOPCIÓN DO SEGUINTE ACORDO

-O Pleno do Concello de Cambre, insta ao Goberno da Xunta de Galicia a poñer en marcha os mecanismos necesarios para ofrecer o servizo de comedor durante as vacacións nos centros educativos precisos no Concello de Cambre, e dar así cumprimento ó acordo plenario unanime acadado no Parlamento de Galicia.

MOCIÓN SOBRE A CONVOCATORIA DE UN REFERENDO SOBRE O MODELO DE ESTADO

EXPOSICION DE MOTIVOS:

A extraordinaria importancia dos feitos acaecidos durante estas semanas, que culminou co anuncio da abdicación do Rei, mostra a necesidade cada vez máis perentoria de propiciar un cambio profundo que favoreza a rexeneración política do Estado español. É por tanto a abdicación unha consecuencia directa da deterioración profunda da Coroa e da decadencia do bipartidismo que foi o soporte do sistema monárquico.

O artigo 57.5 da Constitución española establece que as abdicacións teñen que regularse mediante lei orgánica. Con todo, tal lei aínda non se promulgou e, con todo, o actual monarca xa manifestou, a través do Presidente do Goberno, a súa decisión de abdicar en favor do seu fillo.

Sen dúbida, o momento elixido ten un contexto político e social determinado no que se evidencia, cada vez con maior claridade e forza, que a cidadanía quere participar activamente na toma daquelas decisións que lle afectan. Hoxe día, a democracia xa non pode ser unha mera cobertura sen contido, senón que é preciso que se dote de auténtica lexitimidade, permitindo a participación activa de todos os seus membros. Por iso, é imprescindible que a cidadanía se manifeste nesta ocasión sobre o modelo político do que quere dotarse e póñase en marcha, por tanto, un referendo no que o pobo decida se quere manter a forma monárquica ou, pola contra, opta polo modelo republicano no que a Xefatura do Estado sexa elixida mediante sufraxio universal, libre, segredo e directo pola totalidade da cidadanía.

Este último é o modelo defendido por Esquerda Unida como parte da súa aposta pola rexeneración democrática e un verdadeiro proceso constituínte no que se poñan as bases dunha nova forma de facer política.

Así, e tendo en conta o importantísimo papel que as institucións municipais teñen xogado neste tema ao longo da historia do estado español.

 

O GRUPO MUNICIPAL DE ESQUERDA UNIDA PROPÓN AO PLENO A ADOPCIÓN DO SEGUINTE ACORDO

UNICO.- O pleno do Concello de Cambre insta o Goberno de España a convocar a celebración dun referendo no que a cidadanía española elixa líbremente  sobre o modelo de Estado e decida entre monarquía e república.

ROGOS:

1.- No transcurso da Lexislatura o noso Grupo ten presentado distintas iniciativas para a sinalización e localización de infraestructuras no concello, a pesar das promesas do concelleiro responsable e do propio Alcalde,  comprobamos  como estas e outras propostas  presentadas por EU e demandadas polos veciñ@s de Cambre siguen no mais absoluto abandono.

En este caso vamos afondar mais no problema da sinalización, que de un xeito especial influien na vida de persoas con autismo. Tratase de unha cuestión de sensibilidade social básica e consideramos que debe realizarse de un xeito preferente.

-Por esto PREGAMOS o Goberno a posta en marcha dun plan de sinalización mediante   pictogramas para persoas con autismo nos edificios públicos do concello para facilitar a súa identificación as persoas con discapacidade intelectual.

2.- Recentemente, a través de aviso na web do Concello así como información na prensa, o Goberno ven de suspender as charlas informativas dirixidas ós veciños sobre administración electrónica.

Polo visto, a xustificación pasa polas queixas dos veciños para asistir a ditas reunións no periodo estival.

-PREGAMOS Se nos informe do calendario que foi proposto con lugares e datas das charlas sobre administración electrónica e sobre o número de queixas recibidas en cada unha das parroquias, así como a data estimada de celebración despois do verán, ou a concreta, se a houbese.

3.- A estrada que transcurre entre Lourenziño e a fabrica de Norgasa, presenta en algún dos seus tramos un considerable desnivel sin que exista ningún elemento  de protección que poida evitar accidentes.

-Por esto PREGAMOS, se tomen as medidas oportunas para dotar de seguridade a mencionada estrada.

 PREGUNTAS:

1.-O rio Mero é un enclave natural  do concello con un gran potencial turístico.  No pleno de setembro de 2013, o  Grupo de EU presentou unha Moción, (aprobada por unanimidade), “Para o acondicionamento de zonas de baño e recreo nas ribeiras do río Mero”. Transcurridos oito meses, non temos coñecemento de ningunha resposta ou actuación prevista por parte da Xunta de Galicia nin do concello, en relación a iniciativa presentada.

-Pode informarnos o Goberno das xestións realizadas  para que os veciñ@s de Cambre poidan ter   un lugar de esparcemento e recreo aproveitando o enorme atractivo natural das ribeiras do río Mero?

2.-  Según informacións, a Xunta de Galicia ten licitado a redacción dun proxecto   para a ampliación e mellora da estrada AC-214 entre Guisamo e Sigrás, e no treito entre a AC-213 e a N-550, con un orzamento de 39.932 euros.

-Pode informarnos  o   Goberno   da situación do mencionado proxecto?

3.- No pasado mes de   decembro presentamos un ROGO co fin de valar e proceder a limpeza dun solar situado na rúa Cruceiro, o que  se está a convertir nun vertedoiro de lixo onde a vexetación invade parcialmente a beirarrúa.

-Cal foi o motivo para que non se teñan tomado as medidas oportunas para correxir a situación de abandono?

COMISIÓN INFORMATIVA DE OBRAS, SERVIZOS E URBANISMO

ROGOS:

1.- Nas inmediacions das antiguas  instalacións de talleres Lambda en Pravio, contiguo o camiño de Cela a Fontenla, a sinal de STOP está caida motivado o derrumbamento dun muro.

-PREGAMOS, se proceda a tomar as medidas necesarias para a súa reposición e acondicionamento do lugar.

2.- No lugar de A Patiña en Cela, frente o número 3-A, existe unha arqueta con perigro para a circulación das persoas que transitan polo lugar.

-PREGAMOS o seu acondicionamento.

PREGUNTAS:

1.- O noso Grupo xa ten denunciado o depósito de lixo existente no cruce de Fabás e a estrada de Cela.

-Poden informarnos sobre  a demora da súa retirada?

                                    Cambre,   xuño de 2014

                     Asdo:  Grupo  Municipal de Esquerda Unida

 

MOCIÓN CONXUNTA DOS GRUPOS MUNICIPAIS SOCIALISTA E DO GRUPO DE ESQUERDA UNIDA do  relativa  a adoptar, de xeito inmediato, un “PLAN ESPECÍFICO DE APOIO Á ALIMENTACIÓN INFANTIL QUE INCLÚA O SERVIZO DE COMEDOR NOS CENTROS EDUCATIVOS PÚBLICOS DO NOSO CONCELLO”, a fin de que sexa debatida e votada na sesión ordinaria correspondente ó mes de Xuño de 2014.

EXPOSICIÓN DE MOTIVOS

O pasado dia 11 de Xuño, o Parlamento de Galicia aprobou por unanimidade unha Proposición non de Lei na que se resolve que "O Parlamento de Galicia insta á Xunta de Galicia a levar a cabo as medidas necesarias para evitar que ningún neno ou nena careza de alimentación ou sustento necesario por estar en situación de vulnerabilidade, poñéndose en marcha convenios cos concellos interesados, podéndose usar as instalacións dos centros educativos en colaboración cos servizos públicos de benestar".

A longa e profunda situación económica e social que vimos padecendo, xunto cunha política descontrolada, de austericidio, por parte dos Gobernos Central e Autonómico do Partido Popular, de recortes sociais e desmantelamento dos servizos públicos básicos e dereitos conquistados nos últimos anos, está a provocar un preocupante aumento da pobreza no noso país. Pero o máis grave é que o risco de pobreza afecta sobre todo aos nenos e nenas. Un recente informe da organización Save The Children cifraba en case que tres millóns, o número de nenas e nenos en situación de pobreza.

Desgraciadamente, España ostenta o título de ser unha das sociedades máis desiguais de Europa. Así o reflicten numerosos informes como o que recentemente ven de publicar o Instituto Nacional de Estatística, que indica que prácticamente un de cada tres cidadáns está en risco de pobreza ou exclusión social e que un de cada catro menores de dezaseis anos vive por debaixo do umbral da pobreza no noso país. As cifras de privación material severa, de baixa intensidade de emprego nos fogares e de pobreza relativa, son dramáticas. Segundo os datos oficiais, en Galicia hai 93.000 familias con todos os seus membros en paro; o 23% da poboación atópase en situación de pobreza, 33.000 familias sobreviven sen ningún tipo de ingreso e un 26% dos fogares con menores a cargo están en risco de exclusión social.

A pobreza infantil estase a facer cada vez máis intensa, aumentando a distancia entre as rendas dos pobres e o limiar da pobreza. Dito doutro xeito, e tal como apuntan organizacións como UNICEF ou a Cruz Vermella: cada vez hai máis nenos e nenas pobres e cada vez son máis pobres. Calquera dato negativo que aportemos, desgraciadamente, serán cifras en constante progresión. As políticas públicas ben orientadas poden facer moito pola infancia para contrarrestar os efectos das devanditas situacións de pobreza. O informe de UNICEF sobre pobreza infantil chaga á conclusión de que canto maior sexa a porcentaxe de gasto dos gobernos en políticas de atención ás familias e prestacións sociais, menor e máis baixa é a taxa de pobreza infantil.

O déficit alimentario afecta o desenrolo físico e intelectual do menor. O impacto da mala nutrición ou a falla de estímulos educativos en idades temperás pode ter consecuencias de difícil e custoso arranxo. O profesorado galego, ó igual que os representantes das asociacións de nais e pais, relatan a existencia dun número importante de sinais de alarma sobre a situación que atravesan moitos fogares galegos: nenos e nenas que acoden ó colexio sen almorzar, episodios de mareos e mesmo desmaios entre o alumnado durante a xornada escolar, rapaces que comen de xeito compulsivo no comedor escolar, repetindo varias veces o menú; baixada inxustificada no rendemento académico etc, síntomas todos eles evidentes de que a pobreza infantil está a deixar xa unha fonda pegada na vida de moitos nenos e nenas de Galicia. Fronte a esta situación hai concellos que están a poñer en marcha políticas sociais que funcionan e outros que non.

Os servizos de comedores escolares permitiron mitigar esta realidade durante o curso escolar, pero atopámonos ante un período vacacional incerto no que esta necesidade pode quedar desatendida ao pechar o centro escolar, e por tanto o servizo de comedor. O curso escolar, nos seus niveis obrigatorios, rematou o dia 20 de xuño e moitas familias galegas non saben como poder garantir unha axeitada alimentación para os seus fillos e fillas nos meses non lectivos, diante da grave situación socioeconómica pola que están a atravesar, a que o noso concello non e alleo. É por todo iso que tanto os Socialistas de Cambre como Esquerda Unida de Cambre consideramos que este servizo directo de atención no comedor debe manterse en etapas de vacacións escolares, mediante un Plan Específico.

Segundo a ONG Educo, as vacacións escolares deixarán este verán milleiros de nenos sin a única comida completa do día, a que recibían nos comedores escolares. Mesmo a Defensora del Pueblo, dona Soledad Becerril, solicitou  a todas as Consellerías de Presidencia das Comunidades Autónomas que os comedores escolares atendan este verán ós menores en situación de vulnerabilidade.

Por todo o anterior e tendo en conta a situacion de urxencia e emerxencia que poidan ter que atravesar  familias do noso Concello; os Grupos Municipais dos Socialistas de Cambre e Esquerda Unida presentan ante o pleno a seguinte proposta de acordos:

1.- Instar ó Goberno Municipal a poñer en marcha, de maneira inmediata, un “Plan específico de Apoio á Alimentación Infantil que inclúa o servizo de comedor nos centros educativos públicos do concello" que conteña as medidas e recursos suficientes para garantir que as familias con menores ao seu cargo, que se atopen en situación de precariedade teñan cubertas as súas necesidades básicas de alimentación, e garantir o acceso dos menores, polo menos, a tres comidas diarias, facilitando o acceso a unha dieta o máis equilibrada posible para evitar problemas de malnutrición infantil; habilitando para iso todos os medios a disposición das administracións públicas, en colaboración coas entidades do terceiro sector, e tendo en conta a contorna familiar e o plan escolar.

2.- O Pleno do Concello de Cambre  insta ao Goberno da Xunta de Galicia a poñer en marcha os mecanismos e actuacións necesarios para ofrecer, dende a finalización do curso escolar no mes de Xuño de 2014, o servizo de comedor durante as vacacións nos centros educativos precisos no Concello de Cambre, e dar así cumprimento ó acordo plenario unanime acadado no Parlamento de Galicia, e que ademáis poidan complementar a oferta de actividades infantís programadas en períodos vacacionais.

                                  Cambre, 23 de Xuño de 2014.